Lalpa, nang um naw la chu aw !

Oct.2011

Ka nulien a naunu'n hunlo taka a thi san a nauhai (a upa tak khawm kum 15 cho) ka enin, ka lunginsiet thei em em a; anina taka chu, an nu, ka U’n thina muol a hang liem el hi ka tuor thiem thei hlawl naw ani deu tak. Zanah zal puma ka hang ngaituo chang lem hin chu hrietnaw kar ka lo tap der el ta hlak a; Hi ahnuoia hla hi, chuong ka beidawng ka tap laia Pathien kuoma ka tawngtaina hla -thlamuongna le thangpuina hni a - kan zawt rawp hlak anih:

Lalpa, nang um naw la chu aw !

Mihriem ngaituona ringawt hin chu kan hrietthiem thei lul nawh;

Kan ngai kan lungdit ha’n zamuolpui an liem a,

Hraichawi ha’n chunnu ngaia hringnun an hmang el ding chuh !!!

Lalpa, hnemtu nang hung la,

Kumkhuo in kan kuoma um zing rawh.

I thang naw chun thla kan invai,

Nang kan kuoma um zing rawh.

Nang I um chun Lalpa,

Lusun beidawngna hai khawm,

Tuor a nem hlak;

Nang kan kuoma I um chun.

Hraichawihai ta dingin Lalpa,

Chunnu hnemthiem hung inchang la;

I malsawmna’n vur la,

I chawilai nauhai in ni tir rawh.

Nang I um chun, Lalpa

Buoina sum zing an kieng hlak;

Nang ngei I um chun,

Ieng dang ngai naw ni hai.

I malsawmna I thlamuongna’n,

Hrailenghai hung vur la;

Hnuoi rinum ram khawm ni sien,

Hlimtakin in leng tir rawh Lalpa.

I nina ngei inhriettir la:

Nang ngei an hriet che a,

Nang an kuoma I um bawk chun,

Muongte’n leng ngei an tih.

                                                                   R.L.Muon Inbuon.