DÛTHUSÂM
-Rolungmuon Inbuon
Mihriemin khawmuol ei hung hriet thei chin anthawkin duthusam ei hung nei seng a. Naupangin, “ka nu le pa’n thuomhnaw thar min chaw pek an ta, ka ruolhai nei ang ang nei ve ka tih” ti damin duthu an sam a. Chuong ang bawkin nu le pa hai khawmin, “ ka nauhai inchukna tha ah inchuktir ka ta, hlawtlingna chang an ta, hlimna dam, hausakna dam min tlun an tih” tiin duthu an sam ve hlak bawk a. Choung ang peiin mimal tinin duthusam chi hran hran ei nei seng hlak anih.
Fak le dawn,sum le pai, thuomhnaw, hmu thei thil tienga duthusam chu hril lo a hmâng nisien la.Hienghai ti lova khawm hin hieng hmingthatna, inzâkaina, inremna, thuhnuoirawlna, tlawmna nun- hai hi mitinin mani hringnun a ding, mani sungkuo a ding, mani kohrana dinga duthusam ei nei hlak hai chu an nih. Ei hringnun hmang mek lai le ei hun lo liem tahai dam ei ngaituo kira hma tieng ei hang thlirin , “tuta inthawk chu thang lang ka ta, mi ta dinga malsawmna ni a, buoina siemtu ni lova inremna siemtu ni lem dingin; mi va dem neka mi chawimawitu ni lem dingin; mi’n ka kuoma ngaidam an inhni nghak lova, mihai ngaidamtu ni lem dingin, ti damin duthu ei sam hlaka.
Sungkuo-ah hang thlir nawk inla, “ kan insung hi lawmna le hlimna umna hmun, zaidawtaka indawntuona hmun, inpawtaka lungril inhrilpawna hmun ni sien; nu le pa khawmin, nauhai Pathien thu leh thataka zirtira enkawlin; chuong ang bawkin nauhai khawmin naupang laia inthawka upat hnung chen khawma nu le pa inzataka enin, hnuoia ei pathien an nih ti iengtiklai khawma theinghil lova; chuongchun, inremna le inthuruolna hmun, Pathien thlarauin a i umpui suongkuo, hlimna le thlamuongna umna sungkuo- ni thei sien ti chu ei duthusam ani hlak.
A hmangaina leia Ama ringtuhai kuoma hrietna inthûkbîk mi petu, lawmna thurûk mi petu, thlamuongna mi petu ei Pathien biekna kohran rama khawm hin, “ a huntawk ie!, lawm a um ie!, ei inlungruol takzet!, duthusam dang ei nei ta nawh” ti thei chu ei la ni der naw ni in an lang. Chu nek hmanin, “Pathien rama bek hin chu tiin- mitin inremtaka umin, thil dang dang ngaituoa buoi rak rak nekin, a rawng ei i bawl tak Pathien kuoma tawngtaia, kohran mipui tuelkhawm Pathien thlarau thienghlim pawlna thar ei dawng seng theina dingin tiin hma hang la seng in la; A hnung ei i zui Krista- inremna siemtu, mitin ta dinga damna petu, mi thil suksuolhai ngaidamtu, tlawmna nun neitu- ani angin, eini khawm chuong ang bawka inremna siemtu, ngaidamtu, tlawmna nun neitu- ni seng inla” ti khawm hi, mi pangai ei ni phawt chun, ei duthusam ni ve ngei a tih.
Amiruokchu, hieng DUTHUSAM-hai hin tak inchang zai an rel thei der da’l hi ieng lei am ni’ng a tih aw! Saphaiin ‘duthusam’ hi (building of) “castle in the air” [boruoka in bawl (thil thei lova ngai)] an ti ang el a, duthusam hin kim ni reng reng neilo ding hrim am anih? “Duthusam hi tak inchang lo ding ei hriet zing puma sâm kuol vel mei mei ei nih” ti inla hlak chu ni chie si naw nih a. Lungriltaka invawia, tumna tak tak neia duthu ei sam hai chu Pathien khawmin a min hlawtling tir hlak si a. Chuleiin, mani hringnun ah, sungkuo ah, le kohranah tlung sien la nuom um em em duthusam-ei hang thlur bik deu hai khi- ieng leia tak inchang thei lo am ning ata? Tumna tak tak, invawina tak tak ei nei naw leia tak inchang thei lo am ani??? annawleh iengtiklai khawma puitling ngailo ding reng renga ruot, damsunga DUTHUSAM ringawta thamral ding hrim hrima ruot anni leia tak inchang lo??? ti hi ngaituo um tak anih...!