‘Aw
Thalai’
(Composed
and Sung by Lawmnakim Hrangate)
Lalpa
ta dinga hring hi,
Thalai
hai hringna zung a nih;
Ama
innghila hringnun ei hmang chun,
Boralna
lamtluong a nih.
#Aw
thalai, i vanglaini chun hlim la,
Nangma
Siemtu che chu,
Innghil
mawl naw rawh.
Siemtu
hrelo a hring chu,
Harsat,
beidawngna cho a nih;
Insir
a, Ama kuom tieng pan hai,
Lawmtakin
a lo pawm si.
Damlai
lam suk le tungah,
Mariektea
um lai khawmin;
Mi
thlathlam lo a, vawi le changah,
That
lai hun tawite hin.
**Siemtu
hre lo a,
Hringnun
hmang mek hai,
Khawvel
‘hawi chenin,
Hlimna
i hmu i sawn maw!
Lalpa
ah naw chun, hlimna a um nawh;
A
angsung a chawl dingin,
‘Mi
lo nghak zing ie.
Appreciation-
By R.L. Muon Inbuon
March 20, 2016
kha a ni a. Zantieng ka sin (news report ziek) ka thaw lai zing chun, ka
lungrilah hla pakhat hi a hung inlang a, zuk ngaithlak nuom ngawi ngawina ka
nei tlat a. Chu hla chu, vawitam ka la ngaithlak khawm ni lo, (ka ngaithlak hmasa
tak lem chu ka nute naupasalte pahni haiin a thluk khawm hrietthei ni mang lova
inring taka dittawka an sak kha a ni a), chu hnungah, vawikhat vawihni vel cho ka
sangpa mobile phone anthawka ka la ngaithlak –‘AW THALAI’ ti Nk. Lawmnakim
Hrangate in rawl mawi tak le thiem taka a sak hi a nih.
Ka sinthaw lai
e ti lo chun, a music video chu Youtube ah um rawi naw nim tiin ka hei search
a, a lo um ngei a, ka lawm khawp el. Ka download a, ka hei ngaithlak chu,
dangchar ngawi ngawi laia tuisik inthieng tak dawn ang ka nih, ka dam sawng
sawng el.
Vanglaini hi
khawvela ei um sung chun hun inhawi, thatlai, vullai, hratlai hun a ni a. Bible
khawmin ei chen a phal a nih. Amiruokchu, ro rel peka ei la um ngei ding thuin
a khar a, chuleiin hmang thiem a tul hle. Hmang thiem ruok chu an tak khawp el.
A hun ei khel hnungin hmang thiem dan ei hriet dawk cho hlak khawm a hawi. Keikhawm
ka vanglaini chu ka hmang ve mek zinga, vanglai hun iemani chen chu ka lo hmang
liem ta bawk. Chu ka vanglai huna chun Siemtu hre lova hun ka hmang lai hun
khawm a lo um ve bawk a.
Mi tu el khawm,
Pathien ringtu ni si a, Ama innghila hringnun ei hmang chun a tuortu chu ei ni
bawk ei ni a. Pathien ditdana ei lo umnawna chu inang vawng kher naw sienkhawm,
ei thil thawsuol chun hling angin a mi sun zing hlak a. Mitthli thlak hun a tam
a. Insir le sim a, Ama kuom tieng ei pan hnung khawmin, ‘bul tan that thei ni
sien aw’ ti vawng vawng chang a tam thei khawp el. ‘Ka lo va suol ngei de aw’ tiin, inngaisiet
zawnga lak chang lem chu, khawvel hi a rinum zuol hlak hle! Mi hmuhawiah innui
zing siin, sungril ruok chu a tap hlak.
“Ama innghila hringnun ei hmang chun
Boralna lamtluong a nih”
“Siemtu hrelo a hring chu
Harsat, beidawngna cho a nih”
ti hi a van
dik char char de aw!!!
Hlasak thiem ni
naw lang khawm, thu cho ni lova, hla khawm inhnik mi ka lo ni bawk leh, hi hla
hi, kha zantienga ka lungrila a hung inlang anthawk khan karkhat chu a liem tep
tah a (hi thu ka ziek lai chena hin), a vel, a velin ka ngaithlak a chu ka
nghawk thei nawh. Chu el khelah, hla dang hrim hrim ka ngaithlak san phal nawh.
Hi hla, nal ka
ti em em le a hlathu tha le mawi ka ti em em hi, mani cho a kurinkuk pui el
lovin, ka thalai chanpui hai khawma an lo ngaithlak ve ka nuom a, hi taka hin ka
thiem ang tawkin belchiengna le inpakna (appreciation) ka ziek a nih.
“Chu hla, kha
hla chu nal ka ti de aw” ei ti hin chu, a tlangpui thuin, a hlathu le thluk inhme
a ni hlak a. Ei hang belchieng lem chun, a hlathu le thluk el cho kha lo ni
lovin, a hlathu remkhawm dan dam, thumal hmang thu ah dam, a tlar indawt dan
dam, a hla chang siemrem dan dam, le
adang dang hai khan umzie inthuk tak an lo nei hlak a; khang hai popo intuok
khawm khan hla nal tak el, mi lungril hne thei tak el, a hung suksuok ta hlak a
nih. Saptawngin hang belsa met inla: Literary value/song quality ti hai hin thu
an lo phur hle a nih.
‘Aw Thalai’ ti
hla hi hang belchieng ei tih.
A hla thupuiah
Aw Thalai ti ani angin, thalai nun le inzawm chungchang hla a nih ti ei hriet nghal
a. Ei ngaithlak zo hnunga a hla thupui hang en nawk khawmin hmang awm tak hrim
a lo nih. A funkhawm hne hle. Saptawnga hril chun-the song title is perfectly justified.
Ngaithlak
hmasa tak ding a chang khatna ah, Pathien ta dinga ei hringnun ei hmang chun
hringna zung a ni zie le chu letling char Ama hre fu lova ei hmang ruok chun
boralna lampui hraw ei ni zie chiengtak le tawifel takin a hung tarlang hi lungril
a tawkin a mawi hle. Hieng hin:
“Lalpa ta dinga hring hi,
Thalai hai hringna zung a nih;
Ama innghila hringnun ei hmang chun,
Boralna lamtluong a nih.”
Thumal hmang
thu ah, hringna ‘zung’ ti thumal hin thalaihai chu thingkung angin mitthla thei
a hung ni a. Chu thing hna chu vuoi naw ni a, a kauhai khawm tawl nawng an ta, a’n
thang hun ding chen inthang bawk a ta, ra nei chi a ni chun, ra khawm insuong a
tih. Chu chu Pathien ta dinga hring hai chan chu a nih.
Boralna ‘lamtluong‘
ti thumal khawm hin umzie inthuk tak a nei ti thei a nih. Ama innghiltu hai
chun boralna lamtluong an hraw ngei a, amiruokchu, sima an hung kir chun hmangaitu
Pathienin a lo pawm nuom zing si a nih ti a kawk.
Song quality thu
ah, (vaihla ah lem chu an uor em em el) thumal ri tawp dan inang/inzul (rhyming
word) hai hin hi hla hi a sukmawiin, ngaithlak an hadam tir hle. A tiema tiem ringawt
chu ni sien, ‘hi’ ti le ‘a nih’ ti hai khi an tawp hmuk a, a
saka sak ruok chun, daltu umlo, bau inchip ngailo, awl rawnga lamdawk thei (vowel
sound) in an tawp leiin rhyming mawi tak el ei hmuh. A saktu ta ding khawmin
sak an hawi a, ngaithlatu ta ding khawm a, ngaithlak a hadam.
A thunawn:
“Aw thalai, i vanglaini chun hlim la,
Nangma Siemtu che chu,
Innghil mawl naw rawh.”
ti hi sak nawn
ding a ni ang bawkin, ei vanglaini a chun hlim ding ei ni a, amiruokchu, siemtu
Pathien innghil ding ruol chu ei ni nawh tiin a vel a velin a min fui a nih.
A chang hnina:
“Siemtu hrelo a hring chu,
Harsat, beidawngna cho a nih;
Insir a, Ama kuom tieng pan hai,
Lawmtakin a lo pawm si.”
Hi khawm hi
chang khatna ang deu khin thil pahni chieng tak le tawifel takin a tarlang a. Siemtu
hrelo a nun hmangtuhai chu an hlim rawm sawn an ta, amiruokchu harsatna le
beidawngna cho an tuok ding anih ti tlar hmasa pahni hai hin chieng takin a
tarlang a. Chuonglai zing chun, boralna lamtluong hrawtu chun kirna chang a
hriet phawt chun Pathienin lawmtakin a lo pawm nuom zing si a nih ti tlar
hnuhnung pahni hai khin an tarlang.
Chang khatna
ang bawkin ‘rhyming’ mawi tak el, ‘anih’
le ‘si’ thumal hai hmang an ni a. Chun
rhyme kher naw sienkhawm ‘hai’ ti le ‘chu’ ti hai hi ‘vowel sound’ in an tawp
ve ve leiin, sak inhawi le ngaithlak hadam an ni nawk bawk.
“Harsat, beidawngna cho a nih”
ti hin ka lungril a tawk hle a. Ka ngaithlak zatin “a van dik lawm lawm de aw”
ti’n mit insim pumin ka ngaithlak vawng vawng hlak. A san chu beidawngna cho a
nih ti hi ka chieng ve ta em lei a nih. “Insir
a, Ama kuom tieng pan hai/Lawmtakin a lo pawm zing/si” ti khawm hin lawm
leiin lungriem mitthli an sur tir rawp hlak.
Hla chun thluk
a nei a, vuok (beat) a um bawk leiin, chu chu mila remkhawm a tul leiin, hril
ding hril lang vawng seng lovin a um hlak. Hi hla chang thumna khawm hi chuong
ang chu a nih. Hi hi poetic license hretu ta ding chun buoina a um nawh. Hlaphuoktu
(poet/songwriter) hai hin zalenna an nei hi a um a, chu chu Poetic license an
tih. Chu phalna/zalenna hmang chun, thumal a chenve cho dam, sentence puitling
chie lo dam hmangin, sienkhawm an hril tum kha chu chieng tho siin, an hemkuol
hlak. Chuong ang chun, chang thumna khawm hi a tiema tiem ringawt chun kimnawna/bak
ni awm takin an lang a. Hieng hin:
“Damlai lam suk le tungah,
Mariekte a um lai khawmin,
Mi thlathlam lo a, vawi le changah,
That lai hun tawite hin.”
A hril tum
ruok chu a chieng si. Pathien chu ei damlai lam suk, lam tung, ei thatlai hun
tawite sung, makhat cho a ei um lai le, ei vawi le changah, mi thlathlam lova
mi chelzingtu a ni zie/mi chelzingtu-a ei hmang a tul zie chieng takin a
tarlang.
Hi taka rhyme
scheme (abab) khawm hi a mawi hle- hmu hmai chi an nawh. ‘tungah’ ti le ‘changah’ ti
hi an in rhyme chie a, chuong ang bawkin ‘khawmin’
ti le ‘hin’ hai khawm hih.
Chun hla chu hla
in ni tirtu tak pakhat hlak chu inbiekna/hrilna pangngaia ei hmang ngai naw,
hla a hmang bik thumal (poetic word) a um a. Chuong hai chun lungril hi an fang
bik hlak ti inla hril uor kher naw mei nih. Hi taka khawm hin ‘mariekte’ a hung hmang hi hmangna ding
hmun tak a ni a, a mawi hlie hlie.
Bridge:
“Siemtu hrelo a,
Hringnun hmang mek hai,
Khawvel hawi chenin,
Hlimna i hmu i sawn maw!
Lalpa ah naw chun, hlimna a um nawh
A angsung a chawl dingin,
Mi lo nghak zing ie.”
Bridge hi hla suknal
zuoltu pakhat laia mi a ni rawp hlak hrim a. Chuongtieng chu hril sei dal ei
tih. Hi hla a bridge khawm hi an fu hle. A thu siemrem thu ah, poetic license hmangin
a um a. ‘Inhawi’ aiah ‘hawi’ ti cho
hmang a ni a, sienkhawm a chieng em em a nih. Chuong ang bawkin ‘A mi’ ti lovin
‘Mi’ ti cho hmang a ni a, sienkhawm
buoina ding a um der nawh. Chu naw hrima khawm, ‘Mi lo nghak zing ie’ hang ti hi, a hla tawng ngawi ngawi bik a, a
mawi hle bawk a nih.
Thahnem ngai
tak le thlarau invawina neiin a phuoktu hin a thalai chanpuihai, khawvel inhawi
chena hringnun hmang mek hai chu, hlimna tluontling ni si lo an hmu zie chu
chiengtakin thlarau mitin a hei hmu a. Amiruokchu, thlarau lainatna nei a ni
leiin, nuisaw le hmusit lovin, Lalpa ah naw chun hlimna a um nawh tia
hmangaitaka hril mawl mawlin, Pathien chun a kuom tieng pantuhai chu,
zaidawthei takin a angsunga chawl dingin a lo nghak zing anih tiin a fiel lem a
nih.
Vanglai hun,
thatlai hun hmang thiem hi an tak hle a. Chuong lai zing chun, tukhawm a hmang
thiem hrim an um nawh ti ruok chu a ni nawh. Pathien le hmang kawp tlat hai
chun an hmang suol ngai nawh a. Mi tamtak chuong ang mi chu an um bawk a nih.
Unau, tuta i ngirhmun kha in enfie la, ei Pathien ditzawnga hringnun hmang hi nang
le kei a ta dinga tha tak, insirna umlo chu a lo nih.
Hi hla hin
belchieng a dawl a, a hlathu, a thluk, le a saktu rawlmawi tak leh, iengkim el
hi an fukin, an chawitawk vel vawng ti thei a nih.
Chang khatna
le chang hnina hai hin kei chu ka lungril an hne zuol:
“Lalpa ta dinga hring hi
Thalai hai hringna zung a nih
Ama innghila hringnun ei hmang chun
Boralna lamtluong anih”
“Siemtu hrelo a hring chu
Harsat, beidawngna cho a nih
Insir a, Ama kuom tieng pan hai
Lawmtakin a lo pawm si”
A phuoktu le
saktu hi hmatieng peiah Pathien malsawmna dawng a, mi hai ta dinga malsawmna ni
pei dingin ditsakna kan hlan.
Lawmthu: A hla hmanga
Pathien thlarau malsawmna ka lo dawng a hrietin Pathien kuomah lawmthu mi hrilpuiin,
appreciation ka ziek nuom leia a hlathu (hrietsuol pal kan lau leiin) ka hni
khawm phaltaka a mi hung pek leiin a chungah ka lawm hle.
[Nk. Lawmnakim Hrangate hi Hmar hlasakthiem hmasa
laia mi, ka i ngaisang em em el, Edward TC Hrangate naunu anih. Ama lo la
hrenawtu hai ta dingin, kan holhlimna tawite a hnuoia mi hi:
RLM: 'Aw Thalai' hi i music video hmasa tak am, hi
naw hi a lo um tah?
LNK: ‘Aw Thalai’ hi ICI in album a buotsai a thangsa
ani a, ka video hmasatak chu an nawh. Ka video hmasatak chu saphla “Still a
dream” Class-IX ka ni laia SCHSS album a dinga kan shooting a nih.
RLM:
Album-audio/video i siem ta am?
LNK:
Album ka la siem nawh ie.
RLM:
Hla thar/music video thar/album thar?
LNK:
Tutak hin chu inchukna tieng ka la buoi deu leiin hla thar ka la nei nawh ie.
RLM:
Tuta nang le in family umna hmun & inchukna/sinthawna?
LNK:
Kan umna chu tuhin Light House lane, Lower Lamka lai a nih. Student ka la ni a, BSW 4th
Semester kan chuk mek.
RLM:
Nunghak Lawmnakim tiin ei la ziek thei ti raw?
LNK:
Haahaa!!! Nunghak Lawmnakim tiin ei la ziek thei ie.
LNK:
Ka hla phuok hmasatak appreciation thiem takin i mi ziek pek leiin ka lawm hle
a nih ie.
RLM:
Aw le. Keikhawm ka lawm taluo. ]
