Lung a dam nawh

Chinlai Nunhlui

Chinlai nunhlui liemhnung

Nghilni reng a um thei nawh;

Ngaiin, kokir theichangsien ka nuom

Lungmuongte-a lenglaini kha!

Lungkham hrim nei lo rengin,

Khawdung khawvai hrutin,

Lenruol kimten kan leng ;

Turnipui  senvung le ruopui dovin,

Umni kan kham tudang ngai lovin.

Doralpui, khuolram le lungchimlona,

Harsatna le lungngaina tinreng,

Um theiin kan ring ngai nawh;

Kiltin par ang a vul, lawm a kim,

Nau ang kan innui lungril thlamuongin,

Aw! tienlai maw zuk inchang el ta chuh!

Beiseina khamhrui a sei a,

Pielral ieng nunkhaw nuom hun ngakhla’n,

Chun le zuo lunglawm a kim, innui sieuin,

Thiemna run kan kai malsawmna leh,

Hlawtlingnan  a mi hmuok beiseina thar leh;

Run insang kan kutsuok ngeiah kaiin,

Hringnun tui ang a dam, virthli leng dam hieu leh;

Sawl a dam lungkham nei lo reng chu!

Sienkhawm, Dierkeipa itsikna ral hung hrangin,

A thiem a var hmasa kan hnam a run;

Nunrawngna chelekin Nunau an inrieng, 

Kangmei, hriemhrei a zam Hmar run tinah;

Kan vangkhawzawl riel ang a dei zo tah!

Zaleng lungphang khuoi ang an zam dar!

Hrietlo ram muoltin tlangtin sukin,

Riekmaw ieng invaiin  kir an mawi nawh;

Khuol ang chamin, bul tan tha in, ngai aw lo rengin,

Lung a dam mawl nawh, lung a sa dawn chang ni hin.

Dated Kolasib 26^th September 2013.